Gen 11 | Ndebele | STEP | Umhlaba wonke-ke wawulolimi lunye, lamazwi manye.

k17:15, 20:12

m12:1, 15:7

Genesis 11

Umphotshongo weBabeli

1 Umhlaba wonke-ke wawulolimi lunye, lamazwi manye. 2 Kwasekusithi ekuhambeni kwabo bevela empumalanga ^{▼▼ bevela empumalanga: kumbe, ngempumalanga.} bafica igceke elizweni leShinari ^b, basebehlala khona. 3 Basebesithi ngulowo lalowo kumakhelwane wakhe: Wozani, asenzeni izitina sizitshise lokuzitshisa; lesitina saba lilitshe kubo, lengcino ^c yaba ludaka kubo. 4 Basebesithi: Wozani, asizakheleni umuzi lomphotshongo osihloko sawo sisemazulwini ^d, besesizenzela ibizo, hlezi sihlakazeke ebusweni bomhlaba wonke. 5 INkosi yasisehla ^e ukubona umuzi lomphotshongo abantwana babantu abawakhayo. 6 INkosi yasisithi: Khangela, yisizwe sinye, njalo balolimi lunye bonke, njalo yikho abaqala ukukwenza; khathesi-ke akulalutho olungabehlula abamisa ukulwenza. 7 Wozani, asehle ^f, siphambanise lapho ulimi lwabo, ukuze bangezwa, ngulowo lalowo ulimi lomakhelwane wakhe. 8 Ngakho iNkosi yabahlakazela ebusweni bomhlaba wonke ^g besuka lapho; basebesima ukwakha umuzi. 9 Ngalokho kwabizwa ibizo lawo ngokuthi iBabeli ^{▼▼ iBabeli: okuyikuthi, ukuphambaniseka.}, ngoba lapho iNkosi yaphambanisa ulimi lomhlaba wonke; kusukela lapho iNkosi yabahlakaza ebusweni bomhlaba wonke.

Inzalo kaShemu

10 Lezi yizizukulwana zikaShemu ⁱ. UShemu wayeleminyaka elikhulu, wasezala uArpakishadi, iminyaka emibili emva kukazamcolo. 11 UShemu wasephila, esezele uArpakishadi, iminyaka engamakhulu amahlanu; wazala amadodana lamadodakazi. 12 UArpakishadi wasephila iminyaka engamatshumi amathathu lanhlanu, wazala uShela ^j. 13 UArpakishadi wasephila, esezele uShela, iminyaka engamakhulu amane lantathu; wazala amadodana lamadodakazi. 14 UShela wasephila iminyaka engamatshumi amathathu, wazala uEberi. 15 UShela wasephila, esezele uEberi, iminyaka engamakhulu amane lantathu; wazala amadodana lamadodakazi. 16 UEberi wasephila iminyaka engamatshumi amathathu lane, wazala uPelegi. 17 UEberi wasephila, esezele uPelegi, iminyaka engamakhulu amane lamatshumi amathathu; wazala amadodana lamadodakazi. 18 UPelegi wasephila iminyaka engamatshumi amathathu, wazala uRewu. 19 UPelegi wasephila, esezele uRewu, iminyaka engamakhulu amabili layisificamunwemunye; wazala amadodana lamadodakazi. 20 URewu wasephila iminyaka engamatshumi amathathu lambili, wazala uSerugi. 21 URewu wasephila, esezele uSerugi, iminyaka engamakhulu amabili lesikhombisa; wazala amadodana lamadodakazi. 22 USerugi wasephila iminyaka engamatshumi amathathu, wazala uNahori. 23 USerugi wasephila, esezele uNahori, iminyaka engamakhulu amabili; wazala amadodana lamadodakazi. 24 UNahori wasephila iminyaka engamatshumi amabili lesificamunwemunye, wazala uTera. 25 UNahori wasephila, esezele uTera, iminyaka elikhulu lamatshumi ayisificamunwemunye; wazala amadodana lamadodakazi. 26 UTera wasephila iminyaka engamatshumi ayisikhombisa, wazala uAbrama, uNahori loHarani.

Inzalo kaTera

27 Lalezi yizizukulwana zikaTera. UTera wazala uAbrama, uNahori loHarani; uHarani wasezala uLothi. 28 UHarani wasesifa phambi kukayise uTera, elizweni lokuzalwa kwakhe, eUri yamaKhaladiya. 29 OAbrama loNahori basebezithathela abafazi; ibizo lomkaAbrama nguSarayi ^k, lebizo lomkaNahori nguMilka ^l, indodakazi kaHarani, uyise kaMilka loyise kaIska. 30 Kodwa uSarayi wayeyinyumba; wayengelamntwana. 31 UTera wasethatha ^m uAbrama indodana yakhe, loLothi indodana kaHarani, indodana yendodana yakhe, loSarayi umalokazana wakhe, umkaAbrama indodana yakhe; basebesuka labo eUri ⁿ yamaKhaladiya, ukuya elizweni leKhanani ^o; basebefika eHarani, bahlala khona. 32 Lensuku zikaTera zaziyiminyaka engamakhulu amabili lanhlanu; uTera wasefela eHarani.